Рэчыцкі музей народнай славы

Адкрыты ў лістападзе 1985 года як грамадскі музей баявой славы ў рэчыцкай СШ №2. З часам фондавы матэрыял павялічваўся, спатрэбіліся новыя плошчы пад экспазіцыю. У 1993 годзе музей атрымаў асобны будынак і быў рэарганізаваны ў музей народнай славы рабочага пасёлка Рэчыца.

Экспазіцыя музея раскрывае гісторыю станаўлення і развіцця прамысловага цэнтра раёна-рабочага пасёлка Рэчыца ад глыбокай старажытнасці да сучаснасці. Яна размешчана ў 4-х залах і ўмоўна падзелена на 4 часткі:

• «З глыбіні стагоддзяў». У раздзеле раскрыты найбольш раннія звесткі з гісторыі населенага пункта і да пачатку Другой сусветнай вайны.
• «Гэты боль апякае сэрца». Раскрываюцца падзеі, звязаныя з Вялікай Айчыннай вайной і вызваленнем пасёлка ад неміецка-фашысцкіх захопнікаў.
• «Землякі-ветэраны Другой сусветнай».
• «Працоўная слава рабочага пасёлка».

Фонды музея — гэта дакументы, фатаграфіі, узнагароды, лісты з фронту і асабістыя рэчы ваеннаслужачых Чырвонай Арміі, лепшых працаўнікоў рабочага пасёлка, традыцыйныя прадметы працы і побыту мясцовых жыхароў. Сабраны вялікі матэрыял аб байцах і камандзірах 397-й Сарненскай і 415-й Мазырскай стралковых дывізій 1-га Беларускага фронту, якія загінулі пры вызваленні пасёлка ад нямецка-фашысцкіх захопнікаў, а таксама аб асобах, якія прымалі ўдзел у вызваленчым руху ў гады Другой сусветнай вайны.